شعـــب انتيـــكه

لو مدرس حمار و غبي
و ماعندوش فكرة عن التربية و لا التعليم و لا حتى البطيخ
و تلميذ عنده في الفصل سقط في مادته
ما حدش أبداً بيلوم المدرس و لا يحاسبه
كل الناس بتلوم التلميذ و بس
حتى أبوه و أمه بيقولوا له انت اللي بليد و غبي

ما هو زمايلك نجحوا يا خايب و انت لأ
و طبيب واخد مهنة الطب فهلوة و منظرة
و ما يعرفش حتى يضرب حقنة شرجية
و بيمارس الطب في تخصص غير تخصصه
زي دكتور السياحة عندنا اللي تخصصه نسا و ولادة
و بيوصف لي دواء الالتهاب الارتجاعي للمرئ
و بيوصف لغيري أدوية الضغط و الذبحة

لو الطبيب و لا الطبيخ ده كتب دواء
و المريض اللي كان بيعالجه مات بسبب العلاج الغلط
ما حدش بيلوم الطبيب أبداً
و بنقول ده عمر الراجل و قضاء ربنا – الله يرحمه بقى
ماهو فيه ناس عالجها نفس الدكتور و لسة عايشة برضه و زي الفل

لو واحد جاله فشل كلوي من الميه اللي مليانة بلاوي و لا مخلوطة بالمجاري
بنقول ده قضاء ربنا
انت كمان ها تعترض على قضاء ربنا يا جدع
ما احنا بنشرب من نفس الميه و لا جرى لنا حاجة
سبحان الله ... كله بأمره

لو مريض دخل مستشفى عشان يتعالج أو يعمل عملية لوز و لا لحمية
و طلع على خشبة على سيارة تكريم الإنسان ع القرافة
ماحدش بيلوم المستشفى و لا التمريض و لا الدكاترة

و لو واحد خبطته عربية و جريت
و رجلة اتكسرت و لا حتى مات
أو ناس راكبة اتوبيس ضرب بيهم بالانس في ترعة
أو خيش في مقطورة نقل
ده قضاء ربنا يا عم
دي أعمار و الأعمار بيد الله
إييييييييييييه .... دنيااااااااااااااااااا

**********
إحنا المصريين فينا عادة غريبة أوي
لو أي حد حصل له أي مصيبة من أي نوع
بيفسرها على إنها حاجة من تلاتة

التفسير الأول
إن ده تكفير ذنوب
و إحنا اللي ذنوبنا بقت كتير أوي
و ده غضب من ربنا علينا

التفسير التاني
إن ربنا بيحبنا جداااااااا
و ده ابتلاء من الله عشان يرفع درجاتنا في الجنة

التفسير الثالث
إن ده قضاء ربنا و خلاص
من غير تفسير أصلاً و لا سبب

حلو أوي
و ماحدش أبدا فكر و لا بيفكر يحاسب المسئول الرئيسي و الفعلي عن المصيبة
ها نحاسبه على إيه بس
هو يعني لو مسكناه و حاكمناه و لا حتى قتلناه
ها يرجع ناس ماتت للحياة تاني
و لا قضاء ربنا مش ها ينفذ
ده قضاء ربنا يا عم انت
انت ها تكفر و لا ايه ؟؟

**********
طب و الله العظيم إحنا شعب لقطة
يتعمل فينا كل مصيبة و التانية و نقول ده قضاء ربنا
يعني هي الحكومة كانت ها تقف قدام إرادة ربنا يا عم انت
ده حتى الحكومة نفسها ابتلاء من ربنا عشان ربنا بيحبنا و كاتب لنا الجنة بإذن الله

الناس اللي غرقت في العبارة غرقت عشان ده قضاء و قدر و عمرها كده
و يطلع لك شيخ محترم يقول إن الغريق له منزلة الشهيد
و ماله يا خويا ما يجراش حاجة

الناس اللي اتحرقت في القطر اتحرقت عشان ده عمرها
و يومها طلع شيخ الأزهر ع التليفزيون و قال أنا أؤكد أنهم شهداء
و كان ناقص يقول يا بختهم - و ياريت تتحرقوا كلكوا و تبقوا شهداء

الناس اللي ماتت تحت الجبل في الدويقة
أولا هما اللي غلطانين
و ثانيا أكيد كانوا بيعملوا حاجات أيااااااااااااا و قليلة الأدب
و ثالثا برضه طلع لنا شيخ و قال ان اللي وقع عليه جدار منزلته مع الشهيد

**********
في أيام الحملة الفرنسية بتاعة بونابارته
كان فيه اتجاهين في مصر
أو زي ما تقولوا كده ردين فعل للحملة الفرنسية

الأولاني
اتجاه الطرق الصوفية
اللي قالوا ان نابليون ده بينفذ إرادة الله
و لا يجوز شرعاً الاعتراض أو تغيير إرادة الله
و إن ربنا مكن لنابليون في الأرض زي ذو القرنين كده بالظبط عدم المؤاخذة

و طبعا نابليون كان فرحان بيهم أوي
و حضر معاهم الحضره الزكية و وقف يفقر في وسطيهم كمان
ميه ميه ... هو عايز أكتر من كده ايه ؟؟

و الاتجاه التاني
كان علماء الأزهر اللي عندهم عقل بيفكروا بيه
زي السيد عمر مكرم و غيره من العلماء
اللي حمسوا الناس و قاموا بثورة القاهرة على الفرنسيس
و طلع من تلاميذهم واحد زي سليمان الحلبي اللي قتل كليبر

يا ترى مين فيهم اللي بيفكر صح ؟؟
مشايخ الطرق اللي على ايدهم كان ممكن يبقى اسمي دانييل و لا فرانسوا
و لا السيد عمر مكرم و محمد كريم و غيرهم اللي حفروا أساميهم في تاريخنا

**********
نابليون بينفذ إرادة ربنا
و جورج بوش بينفذ إرادة ربنا
و ايهود باراك بينفذ إرادة ربنا
و كل الناس اللي ماتوا دول شهداء و يا بختهم دخلو الجنة
و الناس اللي اتحرقوا و لا رجليهم طارت دول بقى ربنا بيحبهم و ابتلاهم

**********
طب بالمرة بقى عشان الحبايب و الفرح اللي منصوب ده

أبو جهل لما قتل ياسر و سمية كان بينفذ إرادة ربنا
وحشي لما قتل حمزة كان بينفذ إرادة ربنا
جراتسياني لما قتل عمر المختار كان بينفذ إرادة ربنا
الانجليز لما شنقوا أهل دنشواي كانوا بينفذوا إرادة ربنا

و ولادنا اللي ماتوا في سينا أيام النكسة
و الطيارة المصرية اللي وقعت في أمريكا
و يوسف السباعي و ياسر عرفات و الدكتور المشد

أقول كمان و لا كفاية

**********
طب ما احنا كده بنقول للي بيغلط استمر في الغلط
بنقول للي بيظلم استمر في الظلم
بنقول للقاتل متشكرين و تسلم إيدك يا معلم

إحنا اللي وحشين يا عم الحاج
لأ ... ده احنا ربنا بيحبنا يا كابتن
لأ لأ ... ده انت مش واخد بالك يا مان
الظالم ده بقى بينفذ إرادة ربنا

**********

احنا شعب لقطة
و هيس تعيش كويس
و سلم لي على صفحة الحوادث
شفت الأتوبيس اللي اتقلب ؟؟؟؟